Magistratura bosqichiga kirish imtihoni bo‘lib o‘tdi
2019-yilning 6-avgust kuni soat 8.30 dan 11.00 ga qadar Toshkent farmatsevtika institutining magistratura bosqichiga mutaxassislik fanidan kirish imtihoni bo‘lib o‘tdi. 8-avgust kuni chet tilidan imtihon bo‘lib o‘tadi. Magistratura bosqichiga jami 123 nafar abiturientdan hujjat qabul qilindi. Taqdim etilgan kvota bo‘yicha 65 nafar abiturient magistratura bosqichiga o’qishga qabul qilinadi. Ulardan 49 nafari to‘lov kontrakti asosida, 16 nafari grand asosida o‘qishga qabul qilinadi. Shuni ma’lum qilamizki, magistratura bosqichiga 1 nafar Ibn Sino nomidagi davlat stipendiyasi, 1 nafar I.Karimov nomidagi davlat stipendiyasi sovrindorlari hujjat topshirib davlat grandi asosida o‘qishga qabul qilindilar. Shuningdek 4 nafar abituriyentda IELTS sertifikati bo‘lib, 5.5 dan yuqori ball to‘plagan abiturientlar 8 avgust kuni bo‘lib o‘tadigan chet tili imtihonidan ozod etildilar.
Imtihon jarayoni shaffof tarzda bo‘lib o‘tishi maqsadida jamoat tashkilotlaridan Toshkent shahar Mirobod tumani prokuraturasidan, Toshkent shahar Mirobod tumani hokimiyatidan, Toshkent shahar Mirobod tumani deputatlar kengashidan va Sog’liqni saqlash vazirligidan vakillar taklif etildi. Mazkur imtihon jarayonini ommaga keng yoritish maqsadida O‘zbekiston teleradiokompaniyasining “O‘zbekiston” 24” va “Yoshlar” telekanalllari muhbirlari taklif etildi.
Institut matbuot kotibi N.L.Usmanova
